grand eyeball

RB EYEBALL & COMMUNITY SERVICE July 24-25 2009 Compostela, Cebu

Mga bisdakerz nga nagagikan sa nagkalain-laing dapit ang misalmot sa unang "Radyo Bisdak EYEBALL ug Community Service". May gikan sa Georgia, California, Texas, Hongkong, China, ug ang mga bisdakerz sa Cebu.

Gipahigayon ang maong kalihokan, ubos sa pagpangulo ni Abai Rolly (California), ang tigdumala sa Radyo Bisdak, dungan sa iyang pagbisita sa lungsod sa Compostela, nga nagsaulog usab sa tinuig nga kapistahan.

Ang mga misalmot, labihan ang kalingaw tungod sa kahangop nga magkakita na gayud ang mga bisdakerz nga sa dagitwanang lamang nakigsandurot. Kaon, inum, tabi, sa eyeball nga gipahigayon sa Boardwalk Beach Resort.

Pagkahuman sa kinan anay, mipadayon ang mga bisdakerz sa ANAKPAWIS STATION, usa ka music bar nga gipanag iya sa pamily ni Abai Rolly, diin didto nagpabuhagay ang mga delegado. Inubanan sa live band ug inum, labihang lngawa sa sinayaway kay giangkon sa mga bisdakerz ang tibuok hawanan sa maong bar. Naghuman ang kalingawan sa music bar sa kadlawon, ang uban sama sa mga PIDSI BOYS nanguli kay mapalwug pa sa kanding, ang uban usab nangaligo sa swimming pool sa Boardwalk diin didto sila mi check in ug nagbuntagay ug tabi.

Pagka sunod adlaw, petsa 25, gipahigayon ang "COMMUNITY SERVICE" sa Barangay Poblacion Social Hall. Dul-an sa 200 ka mga bata ang nanambong nga gipakaon ug gipanghatagan ug "school supplies". Didto usab ang ubang mga bisdakerz nga mitabang sa kalihokan. Dayon misunod ang parlor games nga maoy nakadugang ug lingaw sa kalihokan.

Nahimong malampuson ang maong tulumanon tungod sa pagtabang sa mga bisdakerz nga mga "DONORS" ug sa uban nga mibahin sa ilang lawas, kusog, kaikag, ug kasingkasing.